O club de lectura celebrou hoxe a súa festa de despedida

A xente do club de lectura quedamos hoxe ás 12 e 10 para celebrar unha pequena festa de despedida. Non durou moito, só os vinte minutiños do segundo  recreo, pero aproveitámolos ben para repoñer forzas, divertirnos e quedar para o próximo curso, no que contamos con seguir lendo a mazo e pasalo de marabilla.

 

O xoves día 20 toca festa

"Para ler e encantar", guía de lectura das bibliotecas municipais de Oleiros

Como en anos anteriores, as bibliotecas municipais de Oleiros publican unha guía de libros e  discos que poden acompañarnos este verán. Nesta ocasión titúlana "Para ler e encantar" e está cheíña de suxestións aproveitables para distintos gustos e  idades. Invítovos (sáeme de balde) a que leades a entrada completa do blog Bibloleiros na que se informa da aparición e os contidos da revista-guía da que vos estou falando ( só tendes que premer nalgún dos links que vou deixando por este post). E invítovos tamén (outra vez me sae de balde) a que vos animedes a pasar por calquera das magníficas bibliotecas municipais para pillar  unha copia da guía e/ou  o feixe de libros e discos por vós escollidos.

E no seguinte enlace a mismísima guía en formato dixital:

Para ler e encantar: guía de suxestións para o verán 2013

Diario de lectura de "La emperatriz de los etéreos"

De parte do club de lectura, ou máis ben de tres destacadas participantes, Inés, Irene e Florencia, regálovos hoxe esta presentación elaborada con citas sacadas da novela de Laura Gallego "La emperatriz de los etéreos". De nada.

Vai sendo hora de entregar pasaportes lectores e caderniños de lectura

Pídenme que vos comunique que o día 17 de xuño remata o prazo para entregar os Pasaportes lectores e os caderniños de poesía do Recuncho. Que onde hai que entregalos? Na biblioteca, of course. 

"Argo" (a novela), "Bombón el perro", "El jurado" incorpóranse á biblioteca

Para engrosar as posibilidades lectoras das apetitosas vacacións que están á volta da esquina, varios títulos máis se incorporaron onte á nosa biblioteca. Son os seguintes:

Máis títulos en Pinterest, e, por suposto, no noso catálogo.

Maurice Sendak en Google e na biblioteca

A estas alturas supoño que xa veriades o  doodle que estrea hoxe Google para lembrarnos o 85 aniversario de Sendak, o famosísimo ilustrador de "Onde viven os monstros" (entre outras moitas obras, pero esta merece mención aparte). Recórdovos o argumento desta deliciosa obriña:
 

Max escapa da súa casa un día pola noite. Está canso de que lle rifen por facer travesuras e non está disposto a aturar o último castigo que pretenden impoñerlle os seus pais. Como atrevemento non lle falta, Max monta no seu bote e navega e navega ata chegar ao 'reino' dos monstros. Alí noméano rei porque os monstros danse conta de que ningún deles é tan temible como o rapaz. Logo dun tempo de pasalo de primeira cos monstros, Max volve á casa.

O tráiler da película baseada en "Onde viven os monstros" (á túa disposición na biblioteca; a película, non o tráiler)

O 85 aniversario de Sendak en La Voz de Galicia



Obras de Sendak nas bibliotecas municipais de Oleiros

Liberamos "El mundo secreto de los números" e "Cuatro ratones en la selva negra"

Liberamos hoxe dúas donacións que nos chegaron á biblioteca hai pouco. Trátase de dous títulos que de boas a primeiras poderiamos considerar máis axeitados para rapaces ou rapazas de primaria que para os casi adolescentes ou adolescentes feitos e dereitos que habitan este instituto. De calquera xeito, xa saberedes a estas alturas que a  iso da "idade recomendada" dos libros podémoslle facer caso ou non, segundo nos pete. Sigo: os tales libros titúlanse El mundo secreto de los números, de Ricardo Gómez, e Cuatro ratones en la selva negra, de Gerónimo Stilton. Xa sabedes, quedan no Recuncho dos Libros Libres, na entrada do salón de actos.

Procedencia da imaxe

Procedencia da imaxe

Para ler e ver antes de ler

 

As editoriais déronse de conta hai tempo de que lles conviña figurar nas redes sociais, un medio barato e hoxe indispensable para chegar ao público lector. Hai que dicir que algunhas destas editoriais parecen máis espelidas neste punto ca outras. Non vou nomear a ninguén, pero ás veces cóstame atopar información sobre un título, ou unha imaxe dalgún libro que me interesa comentar (e non quero botar man de Amazon ou a FNAC para que logo non se diga que lles carrexo lectores a eses dous xigantes en detrimento das librarías pequenas) e lamento a pouca pericia empresarial que mostran. Non é o caso de  Alianza Editorial, de cuxo Pinterest somos seguidoras nesta biblioteca. Gústannos sobre todo os seus taboleiros "Comienza a leer" desde onde podemos acceder aos primeiros capítulos dos libros que vai sacando esta editorial, e Booktrailers que nos mostra unha presa de trailers de libros da mesma editorial. Déixovos unha captura de pantalla do taboleiro de primeiros capítulos e o trailer de La hija de la criada, de Bárbara Mutch.