Rockeiros eternos

Chegou á biblioteca un libro-tocho de máis de mil páxinas, máis ben pesado (¡ollo! porque pesa, non porque coste lelo) pero que ben vale cada gramo do seu peso. Trátase de "Los hijos del rock", de Salvador Domínguez. O libro é continuación De "Bienvenido Mr. Rock" e está dedicado aos grupos hispanos que triunfaron entre os anos 1975 e 1989. As bandas galegas teñen o seu recuncho no capítulo titulado "La invasión gallega": nel ilústrase a traxectoria de bandas tales como Siniestro total, Golpes bajos, Os Resentidos, Semen up e Aerolíneas Federales.

Ímoslle poñer un cuñiño ao libro, rexistralo debidamente e colocalo na mesa de novidades. Alí te estará esperando, pero corre que seguro que voa.